Dialekt Dr Winter lang, dr Budn karg, oft gobs ner Ardeppln un Quark, dos Lam im Gebarg war schu e ploch, is schenste is ahm unnre Sproch. Grippezeit Spitzname E straffer Wind Mei Nachbar tut garn verrasen Armer klaner Tannebam Mit 60 is mer ka Weibsenschwarm Is Raachermännl De Grät 1. März Gedichte                     Grippezeit De wachst auf un fielst diech net racht, de Hust haste, de Nos left net schlacht. Itze dämmerts, is is wieder mol suweit, Sauwatter is draußen un Grippezeit. De Influenza, su ward se a genannt, hot in Brustkorb fest imspannt. De Knie sei waach, de denkst se knickn un de Gelenke, de kast diech net bicken. De frierst un bist nass vum Schwaß, de Aagn se wassern, de Stern is haß. De wast net war un wus de bist, de wast blus ans, miech hots erwischt. Assen, trinken kast de nischt, weil dr Mog alles rausbricht. De schluckst Troppen un Arznei un denkst, dos wars, is is vorbei. Drei Tog kimmt se, drei blebt se stieh, drei Tog brauch se im ze gieh. Die nei Tog un ich was wu fa ich red, bist de wie durch de Mangel gedreht. Doch uf amol, is is net ze glam, de kast wieder aufstieh, de bist am Lam. De kast laafen, renne un wieder assn, un noch mol drei Tog hast se vergassen. Spitzname Im Gebärg de Derfer sei alle gleich, mar unnerschet net zwischen arm un reich. Mar hot sei Sproch die mar hier spricht un de richting Name die zehln nischt. Mar ward beim Spitzname genannt, in richting hot kaner bei dr Hand. Dr spielt a iberhaupt ka Roll, de Spitzname zehln dohier voll. Do gibs in Emsen, in Bald un de Minn, de Mine, de Mitz, is Battel, de Spinn. Un frechste war die Leit nu sei, hannelster Hu un Spott noch ei. Un weiter git dr lustre Reign, um blus e paar noch aufzezeign. Gibbon, Davt, Alb, Brun, Steppel, Dok, Mops un Sirupmeppel. Un dus de Klemms zam Werner hasen, dus erfuhr iech kerzlich erscht beim lasen, als darham uf in Topp ich soß, mit nar altn Zeitung of'n Schoß. Un e Fremmer, der nach einem Müller fragt, dr bekimmt wahrscheinlich blus gesat. Müller, Müller war sull de dus sei, wie hast dr de mit Spitzname glei. Dos is am dos schiene uf'n Land, hier frecht kaner noch Besitz un Stand. Blus in Spitzname muste hom, sunst hast de hier net viel ze song. E straffer Wind Bei uns im Gebärg, dos was jeds Kind, do blest ab un zu mol e straffer Wind. Vor alln im Herbst hintn naus, do spielt dr sich su richtich auf. Is Laab muß runner vun de Baam, dodrmit, sat mei Vater, hängt's zam. Doch blus fir's Laab? Ar hot übertriem, do brauchetr sich net ins Zeig ze leng. In Warklichkat un do kennt dr lachen, blest dr su straff fir de vieln Drachen. Ne Gusch nauf gemolt, in Schwanz na gebundn, doch is war ka Franzhus dr die Dinger erfundn. E Arzgebärgler solls gewasen sei er stammet aus dr Eck dohier glei. Dus war also net irchend aner, dos war, ihr Leit, e Hartenstaner. Armer klaner Tannebam Armer klaner Tannebam, noch siste rundrim grie, kurz ward's blus sei dei Lam un lang biste net me su schie. Bald stiste in en warme Zimmer, warscht behängt mit Kugeln un Papier. Deine Nodeln sieht mer itze nimmer, nu kumme a noch Lichter drauf zer Zier. Doch dr Gripfel dar is Heilichomd, de Bescherung, glei nochn Neinerlä. Unner dir ward rimgekromd un manches Bamel hots schu imgeha. Huch Neigahr is is dann suweit, dar nodelt ja, dus is net schie. Se hot e End, dei traurichste Zeit, mer trecht diech ze en Container hie. Mei Nachbar tut garn verrasen Mei Nachbar tut garn verrasen, bei de Franzhusen is er schu gewasen. Dr hot geschwärmt, dort is is schie, do dort musste a mol hie. Un weil er su begeistert war, bi iech mol nunner dieses Gahr. Doch iech ka net lang wu annersch sei, blus Darham fiel iech miech frei, drei Dog un mir gefällts net meh un iech will ham nach Hartenstä. Un e anner mol do sat er fei, mensch du gist dohier doch ei. De musst naus aus Hartensta, naus in de Walt, wus annerscht sah. Iech hob gedacht er mans net schlacht un emende hot er sugar racht. Doch iech ka net lang wu annersch sei, blus Darham fiel iech miech frei, drei Dog un mir gefällts net meh un iech will ham nach Hartenstä. Iech hob nochert off ne gehert, heit wass iech is war verkehrt. Ganz weit drim am Pazifik, do versuchste mol dei Glick. Ka Tann, ka Ficht hob iech gesah, kenn Barg un wärer noch su kla. Na, dohier will iech net länger sei, blus Darham fiel iech miech frei, drei Dog un mir gefällts net meh un iech will ham nach Hartenstä. Un gefährlich is is, kaste gelam, e Uglick mächt iech net arlam, in de Nachrichten hamses gebracht, e Flicher is heit runner gekracht. Iech bi gehalt, iech bleib Darham, mir kenntn se sunst wus gahm. Wu annersch kum iech net me hie, in Hartenstä is doch su schie, in dr Waltgeschicht rimfahrn, na na, iech bleib Darham in Hartensta. Mit 60 is mer ka Weibsenschwarm Mit 60 is mer ka Weibsenschwarm, mer hot, uf Neideitsch, Charisma un Charme. De Hill is schu e kla bissel walk, doch wus Heitzedog zehlt is e blus Gald. Vor kurzn musst iech mit'n Bus wu hie, do soß ane drinne, se war gung un schie. Mer hot de Kraft net me wie e wilder Stier, doch wie iech schu sat, mer is Kavalier. Iech grieß freindlich, wie's siech gehert, se lächelt dos miech e Glickshauch durchfährt. Zufällich sah iech mei Spiegelbild in dr Scheib, in Bauch e wing eigezung, nu war iech su weit. Die lädste mol ei un will se grod frong, do stieht se auf um mir wos ze song. Iech dreher men Kopp e kla wing entgeng, ihr Oden entfacht in mir e Erdbem. Mei Herz, is huppt mer fast raus, se flistert, iech steich itze aus, iech wun dohier im de Eck rim glei, kast diech setzn Opa, mei Plaz ward frei. Is Raachermännl Is Rachermännl qulamt vor sich hie, de Kinner sei draußen, is Watter is schie, de Mamm hot blus de Scherz überm Hemd, de Vorfraad is de schenste, is ja a Advent. De Grät De sitzt rimhar mit ner gebrochnen Grät, e bissel wus guts zu Assen is de gresste Fraad, wann is der Scheiß vorbei, stellst dr de Froch un dodrmiet meen ich net de Feiertoch. 1. März Ich stieh am Fenster un guck naus, dar Schneepflug fährt vorbei, de Katz erschreckt und resst aus, in ne Schneeweh fällt sei nei. E Auto dos in Berg rauf wollt, dos hot sich übernomme, is is wieder rickwarts neigerollt, is Friegahr is ahm komme.